Gözdaxili inyeksiyalarintravitreal müalicə

İntravitreal inyeksiya dərmanın birbaşa gözün içinə, şüşəvari cismə yeridilməsidir. Bu yolla dərman retinaya və makulaya yüksək konsentrasiyada çatır, orqanizmin qalan hissəsinə isə çox az təsir edir.

Gözdaxili inyeksiya prosedurası

Hansı hallarda tətbiq olunur?

  • Diabetik makula ödemi
  • Diabetik retinopatiya
  • Retina venoz trombozu
  • Yaş tip yaşa bağlı makula degenerasiyası (YBMD)
  • Xoroidal neovaskulyarizasiya (CNV), o cümlədən yüksək miopiyada
  • Hipertenziv retinopatiya
  • Uveit
  • Endoftalmit (gözdaxili infeksiya)

Dərmanlar

VEGF yeni, kövrək damarların əmələ gəlməsinə və damarlardan maye sızmasına səbəb olan maddədir. Anti-VEGF dərmanlar onun təsirini bloklayır.

Avastin

Bevasizumab. Anti-VEGF qrupundan.

Lucentis

Ranibizumab. Anti-VEGF qrupundan.

Eylea

Aflibersept. Anti-VEGF qrupundan.

Ozurdex

Deksametazon implantı. Gözün içində uzun müddət tədricən dərman buraxır; ödem və iltihabda istifadə olunur.

Hansı dərmanın seçiləcəyi diaqnozdan, OCT nəticəsindən və gözün əvvəlki müalicəyə cavabından asılıdır.

Əlamətlər

  • Mərkəzi görmənin bulanması
  • Düz xətlərin əyri görünməsi
  • Görmənin mərkəzində ləkə

Müalicə

  • Anti-VEGF intravitreal inyeksiyaları (Avastin, Eylea, Lucentis)
  • Deksametazon implantı (Ozurdex)

İnyeksiyadan sonra dərhal müraciət edin

Sonrakı günlərdə artan ağrı, güclənən qızartı, görmənin pisləşməsi və ya işığa qarşı kəskin həssaslıq yaranarsa, gecikmədən həkimə müraciət edin. Bu, nadir, lakin ciddi infeksiyanın əlaməti ola bilər.

Suallar

İnyeksiyadan sonra gözün ağında qırmızı ləkə yarandı. Təhlükəlidirmi?

Bu, çox vaxt iynə yerində selikli qişanın altındakı kiçik qansızmadır və adətən bir-iki həftəyə sorulur. Ağrı və görmə azalması ilə müşayiət olunmursa, narahatlığa səbəb yoxdur.

İnyeksiyadan sonra nələrə diqqət etməliyəm?

Bir neçə gün gözü ovuşdurmayın, hovuza getməyin, tozdan qorunun, damcıları təyinata uyğun vurun. İlk saatlarda gözdə qum hissi ola bilər.

Diabet xəstəsi inyeksiyadan əvvəl nəyə diqqət etməlidir?

Qan şəkəri və arterial təzyiq nəzarətdə olmalıdır. Göz qapağında və ya gözün səthində iltihab (blefarit, konyunktivit) varsa, həkimə xəbər verin: əvvəlcə o müalicə olunur.